柏 (已結業)

柏一向我都几钟意，今次再访都试左啲之前无试过嘅菜式。季节刺身五点有青森县带子、深海池鱼腩、平政鱼、金目鲷同银雪鱼，件件都是厚切又新鲜，次次都必叫刺身😉 豚肉糖心蛋都几推介，豚肉加埋自家制秘制烧汁，烧走部分嘅油脂无咁油腻，而且带来一点焦香，加埋糖心蛋一齐食都几出色。软壳蟹天妇罗炸酱好薄又唔会话过干，仲食到啲膏，都几值得叫。紫薯甘栗饼嘅蓉好滑身，唔会话好多纤维或者过甜，炸得外脆内软滑，都唔错。蒜片牛舌炒得几香口惹味，钟意食牛舌应该会几钟意。盐烧金雕系立鳞烧嘅串烧版本，鱼鳞脆脆同鱼肉焗左都几特别。月见三品包含咗海胆、三文鱼子同埋水云，配埋只温泉蛋嚟食，食嘅唔系口感而系鲜味！土佐豆腐外酥脆内嫩滑，加埋辣萝卜蓉同葱粒，都几啱送酒。鸡脚筋、鸡皮同鸡颈肉等串烧都烧得几好，鸡脚筋劲爽口又唔多地方食到，未食过都可以试下！板神卷有啲似大阪烧，加左海胆蛋黄酱同三文鱼子，即刻升华咗唔少！