植原

营业中

休息中

靓靓妈咪寿辰，周六午餐时份，一家四口就由大肥爸爸带队，前往一间几位好友都曾经推介过o既寿司店「植原」，实行试食兼庆祝 。「植原」喺街道上并唔起眼，正门为拉敞式木门，门顶盖上一块蓝布，低调得黎散发出传统和式o既味道。店子o既英文名称「Uehara」喺木门右旁以橙灯透出，简洁朴实。寿司屋全店只有八个正常高度o既寿司吧位及一张四人散座，以木为主o既间隔简约，坐落舒适清爽。通往洗手间o既后门通道设计成小石路径，地下摆放有的骰灯箱及翠绿色o既盆栽，感觉犹如置身于日本庭园中，如厕都写意过人 。洗手间整洁卫生，洗手盘上两只猫头鹰装饰趣致可爱，kawaii nee ！出面落紧大雨，踏入小店，企喺门边o既一位男生随即接著湿遮，带领入座，并送上热毛巾及绿茶，暖意洋溢。细小o既寿司店重质不重量，只供鱼生菜式，午市餐牌只有一页，晚市则冇餐牌，因只做每位约$1,500起o既「Omakase」（厨师发办）。由于当日已约好与嫲嫲早食晚餐，妈咪胃口又比较细，肥肥家族最终弃选丰盛o既「Omakase」，而一同拣食「特上寿司」午市套餐。周六午市，小店内外全为年轻o既男生。温文有礼o既哥哥仔先送上跟餐o既沙律一小碗。