更多
2014-10-12
2306 浏览
成日听身边朋友讲好烦,有啲故之然喺人事或制度嘅问题,但有啲源于唔知足,对现况好多嘢都不满,当然,人人都有自己嘅追求,不过,晌心态上做到知足就常乐嘛。典故都有讲:乐天知命,故不忧。虽然我唔多信宿命论,但自觉都算喺个乐天派嘅人,食几多,著几多,都唔使下下强求,就好似今晚嚟到乐天皇朝,好味,唔好味,细意品尝,学习欣赏,心情可以轻省好多。由开业至今都成5个月,估唔到都仲喺咁多人,虽然铺面外仍有数张4人枱空著,不过,眼见好多客人宁愿等入面都唔坐出面嘅「商场」位,大抵感觉好似被「楼上」嘅人望实晒。入到铺内,感觉又确喺值得等吓嘅,大堂正中间一个长型水池,池上以青铜莲花灯做装饰,池尾挂著一件透明龙袍,堂皇型格;左右几边都喺卡位,前后都有通花屏风,感觉通爽而不失保留多点私隐,而其他几边仲有啲4、6人枱。入门口左边就喺厨房嘅一部份,透过玻璃就见到多位师傅密密搓、密密包,正正制作紧店家嘅招牌之一「乐天皇朝八种口味小笼包」。虽然嚟之前都已经有几样心水,但都要翻一篇餐牌,睇睇仲有咩好嘢食。除小笼包外,类别仲有点心、汤、凉菜、经典小炒、饭面、拉面、甜品、饮料,以及另一个独立新推「新加坡风味」,全部图文并茂,中英文
虽然8种味道嘅小笼包都可以个别散叫(分6粒份及10粒份,价钱视乎味道有别),但第一次嚟又或多心嘅人,点一笼有齐8款嘅「八种口味小笼包」应该喺最正路,不过,一次嚟3笼会唔会有点夸呢!晌个餐牌里,连个食法都介绍埋,认真细心。有朋友觉得有点贵,但试过又觉得值㖞。
依碟喺食友推介必试,其实油麦菜都食唔少,尤其豆豉鲮鱼炒油麦菜,不过,作为凉菜食都喺第一次,好有新鲜感。翠绿嘅油麦菜卷起并以薄薄青瓜捆成一扎一扎,叠成山丘状,卖相已感觉好清新,食落原来非常爽脆,咬落喺「索索声」;沾一点自家制麻酱,使清新变成香浓,尝出另一种感觉,果然喺必试推介。
蒜泥白肉晌唔同嘅店子食过唔少遍,一向佢个形象都喺薄切一片叠一片,但乐天嘅蒜泥白肉做得好别致小巧,腩肉依然切得非常薄,又唔会好多肥膏;卷起好多青瓜条,再淋上香辣蒜泥,辛香惹味之余,口感清爽好多,好有心思嘅做法。
4款新添嘅新加坡风味菜式中,可能对咖啡有点偏好,所以,对个香浓咖啡骨好有期望。深到近黑嘅咖啡骨,可能卖相有啲唔讨好,但味道绝对有特色。虽然称为骨,但用上猪扒做,啖啖肉,加上质感好松化,部份边位又有焦脆效果,叫人食得满足;撒上少少杏仁片,除点缀一下,会唔会有种好似「饮」榛子咖啡嘅错觉呢?而个汁嘅咖啡味道好浓香,个人稍嫌偏甜,事后向店员反映,原来个汁加入咗苹果焖煮,若再稍微减少少甜度相信更适合大部份港人。见佢依次个新加坡风味菜做到10月尾,既然个咖啡骨咁有特色,希望正式放入大牌度,或再做长少少,等小弟可再带朋友去试。
晌大牌度又唔少拉面选择,招牌之一喺猪骨汤拉面,亦有多款非猪骨汤拉面,合共近20款,不过,既然期间限定嘅新加坡风味有一款喇沙拉面,喺咪应该先试依个呢?
一客有3件,炸得涨涨,糁上糖霜,好传统嘅沪式甜点。个皮比较厚,但不失软绵,豆沙蓉唔算好多,香蕉肉则比其他店相对多,两者夹杂仍然清甜滋味。
张贴