小印度餐廳

营业中

休息中

星期六同朋友一行三人一齐去左食印度菜，”小印度餐厅”位于佐敦，地铁站出几分钟就到，非常就脚。餐厅光猛，晚上时间都有唔少食客，座位阔落，坐得舒服。先有个小食脆饼，脆卜卜，配左个青色嘅酱，酱味道好清，中间有好微好微嘅辣。印度炭烧烧板餐嘅串烧鸡，上菜嘅时候烧板D烟系一直咁冒出黎，烧板好够热。鸡肉大大件,底垫左椰菜，萝卜丝，有几片青瓜，挤埋柠檬汁，味道更加出众。鸡肉好嫩滑，仲好有肉汁，带香草味，唔算系太浓味嘅菜式。而垫底嘅椰菜，萝卜丝吸哂鸡肉肉汁，爽口好食。牛肉炒饭好干爽，唔会好油,饭粒长形幼身，粒粒分明，食落口感十足。配料仲有D芫茜同萝卜，牛肉大件，唔系切到细细粒炒。牛肉炒饭同样偏重香料味，好有特色嘅炒饭。玛沙拉羊肉，玛沙拉一直系几钟意嘅印度菜，多种香料混合之下，感觉每一间印度餐厅都有说不出嘅不同。今次食玛沙拉羊肉，玛沙拉质地结身，香料味重之余食落有好微嘅香辣,点黎食芝士烤饼一流，完全停唔到口。羊肉煮得好入味，食落一丝丝，但唔鞋，亦冇膻味。芝士烤饼好烟韧，加埋芝士食落更软绵绵更香。饮品叫左菠萝香蕉拉昔，食到有D菠萝碎，好香菠萝同香蕉味。