北京王府水餃 (已搬遷) 新店位置

讲起食饺子，我仍然好怀念六年前在北京一个隆冬嘅夜晚同一班朋友漏夜前往一间位于胡同内嘅食店食饺子。当晚气温只系零下十度，店内冇暖气，冻到我地个个都瑟缩一团。冇耐店主就拎嚟一碗碗热腾腾嘅饺子，𠮶次系我一生人食嘅最好嘅饺子。一碗只系一蚊，之后就再食唔番。阿K成日话向摆花街附近有好多食肆，经济抵食，其中一间就系王府。当晚我地嚟到已经接近十点，老板见落雨冇乜人准备打烊。由于我地唔想阻住老板收舖，所以我地只系嗌咗两客菜肉饺。一客有十只，皮厚厚的，就如当年我向北京食嘅饺子一样。咬落去啲肉汁已经涌出嚟，好有肉嘅鲜味。点埋酱汁，唔驶一阵就成客饺子食个清光。一客大约三十蚊，好抵食。谂落食北方嘅饺子都系要向天寒地冻食至够过瘾，香港实在太湿、太热喇。