朝天門

营业中

休息中

今日同同事去中环嘅「朝天门」试咗佢哋嘅商务午市套餐，真系有惊喜！首先个「非遗鸳鸯锅」一上枱已经霸气十足，红油锅𠮶边系招牌牛油汤底，麻香劲道但唔会呛喉，另一边拣咗菌汤，鲜甜得嚟平衡返辣味，啱晒我哋呢班又想食辣又怕太刺激嘅人。最正系个锅中间仲有个玉玺造型嘅盖，打卡一流之余，仲呼应返餐厅「朝天门」嘅历史故事，食个火锅都食出文化感！餐前小点嘅「重庆小吃组合」非常之特别嘅重庆小食有白色嘅米糕，长条型嘅脆脆同埋怪味豆「特色三拼」集合晒鲜毛肚、冰川鹅肠同「烽火戏诸侯」（黄喉）。毛肚真系名不虚传，大大块又够厚身，烚十秒左右入口爽脆到「嗦嗦声」，完全冇雪藏味，果然系重庆火锅嘅灵魂！鹅肠处理得干净，冰镇住上枱，灼完仲保持到脆度，正！黄喉摆喺个迷你烽火台装饰上面，玩味十足，口感弹牙有嚼劲，同事话似食紧「脆口版猪颈肉」咁过瘾。另外「丸滑拼盘」有手打虾滑同墨鱼滑，真材实料，虾滑仲食到粒粒虾肉；「肉多多午餐肉」唔系普通罐头货，厚切煎香过，有肉香又唔会太咸；「精品翼板肉」油脂分布均匀，轻轻一灼就食到牛味，唔使点酱都够正。菌菇拼盘有齐金针菇、鲜冬菇同平菇，新鲜爽甜，尤其吸咗菌汤之后更加鲜味；茼蒿菜嫩绿无渣，解腻一流。