見見面 (已結業)

出面好多地方标榜自己D辣几劲几劲，可惜都系一味死辣，只系得个劲度，但系就无晒味道，不过呢一间九龙城小店就唔同，个辣好有层次感，同埋食得出辣椒之外，仲有其他香料嘅味道。送啤酒必备︰辣子肥肠，睇吓幅相D辣椒，坚正，喺个椒海度摷D肥肠出黎都几过瘾。呢个肥肠最特别嘅地方就系无晒D肥膏，如果想食肠但系又怕肥膏嘅就啱晒，辣椒味当然劲，但系旧肥肠又保留到D肠味，无比D辣椒盖过晒佢D味，好野。跟住叫咗酸菜鱼，条鱼可以拣桂花或者龙趸，我地拣咗龙趸，食落都几好，肉质弹牙，鱼身都滑(不过当然无桂花鱼咁滑啦)，而且比想像中少骨。个酸菜汤都好惹味，酸酸辣辣几好食。甜品就叫咗桂花冰粉，第一次食又几好食，感觉上就系透明嘅凉粉。冰粉本身无味嘅，不过捞埋D糖浆之后又真系唔错，加埋少少桂花，又清香又可以解下辣。