正宗山西刀削麵店 (已結業)

去呢類地方都預咗環境唔會太好，去到都幾爆，好彩咁啱有人走唔洗等。揀咗牛腩豬大腸刀削麵，牛腩入味，有啲肥膏又唔係成口油嗰隻，豬大腸係因為見有人話好食就叫嚟食吓，冇腥臭味，鹵得幾腍之餘仲有爽脆口感。呢間話刀削麵係即叫即削，呢種麵比平日啲麵多凹凸位，咁就可以帶多啲湯，但夾起嗰時好易晌筷子之間滑出嚟，所以一定要用支匙羹輔助先食到。湯底方面都幾濃，有啲鹹不過我都接受到，只係浮晌面啲油有啲嚇人，都係適宜久唔久食一兩次咋。