順德聯誼總會

营业中

休息中

顺德拆鱼羹做得好好，有鱼香无鱼鯹，当然亦无鱼骨啦，佢D葱吊起咗D鱼肉嘅鲜味。翡翠海皇酥拼虾酱骨就觉得比较一般D，翡翠海皇酥好大旧有少少饱肚，虾酱骨就无乜虾酱味。煎焗鱼咀真系比鱼咀你而唔系成个鱼头就咁上，欣赏佢够讲究，另外个咬开个面就见到师傅真功夫，入面好鲜嫩。子姜面酱蒸鱼云新鲜好味，个子姜面酱用黎配个鱼云真系好夹。梅子香芋碌鹅嘅鹅就肥咗少少，不过佢个梅子汁做得好好，令到呢个𩠌好开胃又唔会滞，最好食系下面垫底的芋头，吸晒梅子汁同埋D鹅油，超好食，系成个𩠌嘅精髓所在。脆皮酿鲮鱼真系一门功夫菜，呢度嘅师傅做得好好，由个样到入面酿嘅加咗虾米嘅鲮鱼肉都好掂，不过记住要点佢个辣椒豉油，点咗真系会好食好多。玻璃皮乳鸽虾子柚皮又系做得好好食，佢用咗柚青去做，清香得黎又无咁滞。自家制鱼腐浸胜瓜个自家制鱼腐好香蛋味，胜瓜去皮够晒嫩。顺德月婆炒饭炒得够干身，有镬气。蛋白杏仁茶做得好香，又唔会太甜，几好。