蘇媽.蘇媽馬來西亞茶餐室 (已結業)

苏妈苏妈唔单止门面靓，入边嘅装修仲好有特色。一字骨肉骨茶要先饮咗个肉骨茶先，之后再食入边嘅𩠌菜，记得要调校自己喜欢嘅酱油，之后再叫店员添返热辣辣嘅肉骨茶，一字骨都算多嘅大概有四条，仲有豆腐卜，同埋金菇，肉骨茶嘅味道非常之浓，好饮。招牌砂煲老鼠粉，店员嚟到都提我地要趁热搅拌，捞匀咗之后食，入边嘅鱼仔好咸香，仲有老鼠粉好弹牙，捞埋一齐嘅口感系弹牙仲有鱼仔嘅鲜味。马来黑叉烧，叉烧半肥瘦，加上蜜糖嘅味道，真系难以抗拒，如果好怕肥肉嘅人可以选择净系食瘦𠮶部份，不过我真系抗拒唔到，个腩肉系非常之油分丰富。马来西亚串烧(6串)，串烧加埋沙嗲酱，简直系好有马来西亚嘅风味。甜品就点叫一个海南鸳鸯烧面包，呢个面包入边有一块厚厚嘅冻牛油，再配合埋热辣辣烘咗嘅面包，加上咖央酱，可以话系内冷外热，仲要脆卜卜，真系减肥都要放埋一边先。