Simplylife Bakery Cafe (已結業)

早排去megabox睇戏, 路过德福见到simplylife, 所以就决定食呢间。下昼一点几嘅simplylife门口都系好多人, 大概等咗20分钟先入到去。入面嘅枱都几迫, 完全无私隐性。可能在场都几多客, 所以都比较嘈, 同酒楼差唔多, 就算同坐对面啲人讲野都要大声啲。我地叫咗两个set, 分别系烤美国春鸡半只、车厘番茄西班牙甜椒辣肉肠同埋忌廉蛋汁烟肉手制意大利粉。每个set118蚊, 附送餐汤/沙律同埋饮品, 饮品有冰茶同汽水可以拣。烤春鸡嘅酱汁比较咸, 但鸡肉煮得啱啱好, 无过熟嘅情况出现。部份烤春鸡嘅鸡肉比较干, 可能系酱汁唔太够。配上车厘番茄食都唔错, 当食到中途可以食粒番茄解腻。至于辣肉肠就无出现过, 可能系俾漏咗。忌廉蛋汁烟肉手制意大利粉一上菜就闻到好香, 食落亦有极浓嘅忌廉味, 成个意大利粉都好creamy, 如果唔太钟意呢种咁creamy嘅质感, 可能要饮啖冰茶化解吓。有唔少嘅厚切烟肉布满喺意大利粉上面, 多到食到最后仲有一堆烟肉未食。厚切嘅烟肉有一层脂肪, 食落虽然好香, 但会充满罪疚感, 减肥人士勿点。