小火焰韓式咖啡廳 (觀點中心) (已結業)

今日好想食韓國嘢, 所以同朋友去咗觀塘呢間小火焰食嘢,我哋六點左右去到就唔使排隊。環境都幾好裝修得唔錯，見到餐牌真係好多唔同嘅韓國嘢可以揀嚟食，搞到我心大心細。最後我揀咗芝士海鮮菜餅，炸紫菜捲，同埋一杯芒果冰沙。海鮮餅嚟到仲係熱辣辣，size啱啱好唔會話太大，上面有唔小魷魚蝦等等嘅海鮮，芝士仲係微微拉絲，亦都鋪咗一啲泡菜喺上面，食落脆卜卜，唔會覺得膩。炸紫菜捲超級無敵驚喜，外皮超酥脆，紫菜味好香，入面有啲好似粉絲咁樣嘅嘢，軟糯軟糯 ，真係建議大家都要試下。芒果沙冰嚟到就好大杯，差啲放唔落，唔會太甜，都幾天然。我同朋友食完嘅時候大概七點三左右，成間餐廳已經滿座，建議大家可以早啲嚟試下真係唔錯！！