暢和麵家

营业中

休息中

因工作關係今日又入到黎大埔食晏晝。其實暢和麵家一早已經好想試，之前假期嚟到大埔見到太多人唔想排隊，今日一支公終於可以坐低食番餐。舖頭喺商場一樓，其實座位好少，目測所見應該唔會超過12個位。不過門口擺咗啲枱凳，上次假期過嚟嘅時候係會開晒，但係應該都唔會超過20人。因為我未夠中午12點就已經到達，所以當時定唔係好多人。舖頭嘅牆上除咗見到大大個餐牌以外，又見到好多有意義嘅海報， 十分正！未坐低之前其實已經諗咗今日要食乜嘢，所以好快就已經落單。今日我嘅午餐係：醉雞$36軟腍入味，雞皮爽脆，雞肉軟滑，花雕味肉味平衡。呢個價錢一啲都唔貴。雲吞麵（幼麵）$27湯頭清甜不過鹹。淡淡的大地魚以及九黃嘅香味。生麵爽口彈牙，沒有過分嘅鹼水味。雲吞係細細粒，跟着一條金魚尾。豬肉肥瘦比例剛剛好。雲吞有五隻，絕對慷慨。雲吞餡料入邊混入類似豬軟骨嘅配料（？），令到佢口感特別有層次。真係好唔錯。搞到最後連碗湯都飲埋。今個午餐無論價錢，食物一質素，以及人情味都令人回味。食完之後提升咗不小嘅正能量返去繼續為工作奮鬥。