前家樂餐廳火鍋店 (已結業)

見餓餓地，就一家人去左大角咀食野。呢間火煱雞煲第一下最吸引人既相信就係佢個名──前家樂。一開始既客人唔算多，加上間餐廳係以家為主，希望客人可以有家的感覺，所以老闆好熱情咁同我地推介唔同既食物同埋同我地傾計XDD但食到7點幾8點，就開始慢慢熱鬧起黎，老闆都要忙住招呼唔同既人客，而我地又要繼續忙住開餐啦。今次叫左個烤海烷魚煲(大邊)同花雕醉雞煲(一隻)，都幾有驚喜。老闆話海烷魚係咸淡水交界(如果冇記錯XDD)，冇泥味，於是就叫左個烤海烷魚煲(大邊) (老闆話即係有魚骨個邊)，大大條，原本以為會好“鞋口”，但原來都幾滑，加上師傅只係烤到條海烷魚5成熟左右，之後放係我地面前慢慢煲，咁就確保D魚肉唔會因為我地係咁煲而令到D肉實曬。而個湯底係蕃茄薯仔湯(岩曬唔食得辣既人)，本身都擔心清得滯，但師傅又落左D面豉醬去個湯底定條魚度，令個湯變到好濃好香。而花雕醉雞煲(一隻)個湯底亦非常足料，加上醉雞係自己落去個湯底度，一熟即食，酒味又濃又香，雞又滑。食完雞仲叫左D蝦滑墨魚滑、菜、竹笙等等，真係超級飽，又超級滿足!!!