影片
更多
2016-07-20
6680 浏览
继2014、2015连续两年一班死佬入到屯门三圣村「兴记」大擦海鲜，接续依个传统，2016再豪多一餐 。本来想试吓其他区域嘅海鲜酒家，但大佬话要三战三「胜」全取九分，所以就三战三「圣」。不过，严格嚟讲，今次唔算完全喺「三圣」之战，因为，改改策略，先去有香港筑地之称嘅荃湾杨屋道街市买海鲜 ，再入三圣村斜对面山丘之上嘅「容龙海鲜酒家」，依间嘢都喺有死佬试过嘅推介。未讲酒家，就直击吓晌杨屋道街市嘅实况，街市楼高四层，地下全层主打卖海鲜，所以几十档，人头涌涌 。而且，叫得香港筑地，档口多之余，价钱比晌三圣真喺平平平一大截。好似啲美国桶蚝，对比旧年食评嘅资料，三圣卖$160（大桶），杨屋道卖$85（大桶），质素一啲都唔差；东星斑晌杨屋道断条卖，条条两斤几，一条先$350，但三圣要$380一斤㖞 。不过，濑尿虾最后都返去三圣买，因为行匀个街市都喺细只咗啲，唔够睇头，但三圣买真喺好贵。顺便介绍吓杨屋道街市嘅「陈女东记」海鲜（兜到我都唔记得佢个位置，大概正中间），睇匀咁多间，依间海鲜铺真喺选择多多，平价 、贵价都有，觉得取价公道，而且，啲店员好好相与，又唔介意我哋影吓相，最钟意喺佢哋明码实价标
未讲酒家，就直击吓晌杨屋道街市嘅实况，街市楼高四层，地下全层主打卖海鲜，所以几十档，人头涌涌 。而且，叫得香港筑地，档口多之余，价钱比晌三圣真喺平平平一大截。好似啲美国桶蚝，对比旧年食评嘅资料，三圣卖$160（大桶），杨屋道卖$85（大桶），质素一啲都唔差；东星斑晌杨屋道断条卖，条条两斤几，一条先$350，但三圣要$380一斤㖞 。不过，濑尿虾最后都返去三圣买，因为行匀个街市都喺细只咗啲，唔够睇头，但三圣买真喺好贵。
顺便介绍吓杨屋道街市嘅「陈女东记」海鲜（兜到我都唔记得佢个位置，大概正中间），睇匀咁多间，依间海鲜铺真喺选择多多，平价 、贵价都有，觉得取价公道，而且，啲店员好好相与，又唔介意我哋影吓相，最钟意喺佢哋明码实价标晒价钱嘛 ；有位疑似店主，唔知会唔会就喺「陈女」，好识做生意，样样平多十蚊八蚊，所以，原先只卖三几样嘢，依家就执咗7样海鲜 。
结果，走访两地，一共买咗11款海鲜，夹埋$3,310，价目大概如下：加拿大象拔蚌（$480条）$460 - 杨屋道陈女东记
大花蟹（$220斤）一只$470 - 杨屋道陈女东记
肉蟹（$140斤）两只$270 - 杨屋道陈女东记
大虾（$56斤）两斤$110 - 杨屋道陈女东记
蛏子（$56斤）22只$170 - 杨屋道陈女东记
花螺（$64斤）两斤$120 - 杨屋道陈女东记
桶蚝（$85大桶）两桶$160 - 杨屋道陈女东记
东星斑（$350条）$350 - 杨屋道其他街市档
带子（$30份）$90 - 杨屋道其他街市档
濑尿虾（$280斤）11只$840 - 三圣关财记
南非6头鲍鱼（？斤）11只$450 - 三圣关财记
比起上次单晌三圣买海鲜料（9款海鲜，共23斤，$5,180），今次款、量都多过上次，但足足平咗一大截 。
「容龙」有啲60、70年代嘅风貌，门口位整个喷泉，最搞嘢地下入口仲有个牌匾叫「容龙别墅」，至于大堂环境，就肯定好过三圣村冬菇亭𠮶堆酒家啦，更曾获米芝莲推介食府衔头，羊毛出自羊身上，自不然样样收费都贵人一截啦。
晌兴记代煮海鲜，唔鬼理你点煮法，总之油料费断斤计，旧年5月嚟嘅油料费喺$58斤；但晌容龙就复杂咯 ，有断斤计（$96斤），有断只计（如贵妃蚌、鲜带子，$18只，随时油料费贵过啲食材），亦有断桶计（如美国桶蚝，大嘅$130，细嘅$70），仲有其他计法，总之，埋单时你都未必睇得佢明 。
当然，唔卖海鲜嚟代煮，佢哋一样有好多海鲜菜式，不过，收费就唔便宜啦，但食海鲜就预咗喺高消费。除海鲜外，我哋亦额外再点半只烧鹅过过口瘾，再加3碟时蔬均衡吓餐饭。
加拿大象拔蚌刺身+堂灼 其实，条象拔蚌本身晌陈女东记买𠮶时，已帮我哋起埋肉做刺身，不过，嚟到容龙佢都讲到明都照收油料费，至多再洗干净啲，加啲芫茜、椒丝摆靓啲，加个上汤做堂灼。咪睇陈女东记喺街市档，人哋日日切嘢无数，功多艺熟，佢哋切嘅象拔蚌刺身比旧年晌兴记做得仲好，厚薄平均，而已，大细均一，入口爽脆，沾少少豉油，鲜味尽出。亦试过灼一灼嘅效果，灼过嘅象拔蚌，口感会变得软腍啲。
自家制挂炉烧鹅 $230 / 半只 依度食烧鹅唔使预订，想食就点，较方便。虽然唔觉听闻佢啲烧鹅特别出名，但高质素，皮脆肉香，富鹅油嘅脂香，却喺无膻味。
白灼大虾 灼虾就喺为食其鲜味，容龙就当佢喺中虾，但我就觉得喺大虾嘅尺寸，入口够肉地，鲜甜爽口，沾丁点豉油提鲜，一流。两斤大虾两食，一斤白灼，一斤豉油皇炒，两碟都好够份量，陈女真记真喺好足秤。
豉油皇原只干煎大虾 食个白灼大虾已品尝到虾嘅质素有几鲜，再嚟豉油皇煎，咸鲜惹味，虾肉保持弹牙，实在好食。
只喺食咗几道菜，就发觉越食越热，跟住就越嚟越焗，原来全个大堂坏冷气（得番啲VIP房有冷气），真喺大镬。结果食完餐饭都解决唔到，亦从无人嚟解释个情况，更无人嚟讲讲补救方案 ，得啲侍应不时拎啲冰俾我哋，我哋亦只有灌多两啖汽水解「暑」。尤其依家咁嘅天气，搞到各大佬食到标汗，唔喺讲笑，食到衫都湿晒，对面枱位哥仔除剩件底衫，认真街坊 。所以，服务一环唔合格，唔喺因为你哋坏冷气，我都知事出突然，而喺处理手法，完全无理会食客嘅实况，就连任何补偿方案都无提出过，搏啲食客唔出声当无回事，所以，见有好几枱食客都「嗱嗱临」打包埋少少𩠌尾走。
蛋白花雕蒸大花蟹 因为都喺啱啱开始无冷气，所以，都唔影响食呢个蒸大花蟹嘅食味。以上几道菜都做得出色，而依道蛋白花雕蒸一样精彩，蛋白滑溜无比，淡淡花雕酒香，香得嚟唔会太呛，至于只花蟹，多谢各位大佬让只钳俾小弟食，鲜甜多肉，正到爆。
豉椒炒蛏子、蒜蓉粉丝蒸蛏子 晌陈女真记见到啲「肥仔」蛏子好抵买，以前又未试过，人头数执够22只，谂住两食：豉椒炒及蒜蓉粉丝蒸，点知店家搞错晒，全部拎去豉椒炒，加个米粉底，唔怪之得炒到咁大碟。味道唔错，好惹味，配米粉都好正，不过，蛏子口感有少少韧。
姜葱煀桶蚝 桶蚝嘅水准唔错，够大只，再者，煮熟后亦唔喺点缩水，仲喺大大件。以姜葱煀，香气十足，葱香配蚝，真喺不俗。
清蒸东星斑条星斑够晒份量，大家都觉得好抵食，不过，咁大条的确好虾人煮，结果，条鱼蒸过笼，近骨位啲鱼肉好实好嚡，其他位都几好，鱼鲜味十足。
果皮蒸南非鲍鱼 碟鲍鱼蒸得有啲迤，鲍鱼本身喺有质素，大只有睇头，既有鲍味，又烟韧啜刀，可惜果皮味淡薄无痕，似有还无，比兴记煮得无咁好。
星洲黑胡椒炒肉蟹 室温越嚟越高，再嚟一道黑胡椒蟹，真喺气热逼人。两大只肉蟹炒出一大碟，啲黑胡椒极为入味，但又尝到肉蟹嘅鲜，只蟹又好好肉，好味指数喺啜晒手指。
椒盐濑尿虾 濑尿虾指定椒盐油泡，喺我哋一班死佬嘅指定菜式，不过，计埋油料费，依碟嘢要过千，但至紧要喺做得好食，咁先值番晒。细心拆壳后至慢慢叹，虾肉鲜甜，椒盐味足，无令大家失望。
XO酱西芹炒带子 唯一一碟有得睇，无得食嘅菜式，皆因晌街市档买一份份嘅带子，煮出嚟好腥，果然贪平濑嘢，故此成碟无要，不过嘥晒啲油料钱。由于油料钱断只计，实情贵过啲鲜带子。
椒盐象拔蚌胆 虽然我哋一班死佬年纪有番咁上下，称得上百病丛生啦，但无惧胆固醇依家嘢，象拔蚌个胆梗喺食得唔好嘥啦，拣椒盐一于唔健康到底。惹味就惹味，挑剔少少就喺粉浆整得有少少厚。
椒丝腐乳炒通菜 $78 话唔健康到底，都要食番多少少菜，喺度食海鲜固然之贵，但啲炒菜又唔算贵㖞，碟头亦够大，个通菜炒得颇香。
北菇扒芥菜胆 $98 大花菇用上大只靓货，菇香厚肉，但一碟得5只，手快有手慢无，我就梗喺唔执输啦！
大澳唐生菜煲 $88 几碟炒菜都炒得上乘，但个人偏爱少少个唐生菜煲，因为以大澳虾糕炒，咸香突出，生菜仲带少少脆身。
辣酒煮花螺都唔知喺咪厨房大佬玩嘢，已经无冷气成个几钟㗎啦，个大堂够焗够晒高温，临尾先出依道辣酒煮花螺，惊辣你唔死。小弟就无心情食喇，嗜辣嘅老友反而食得津津有味，又话啲螺肉够厚身，不得不佩服佢咁嘅环境都仲到咁辣，睇见窝嘢我都已经标汗咯！
生果碟临尾送碟西瓜都无补于事，除咗打边炉会边食边灌汽水外，今餐饭都可以讲绝无仅有一晚灌几罐汽水。讲笑咁讲，有少少回复惜日大热天时坐大牌档嘅感觉 ！
以前读中学后生嘅年代，炎夏中午踢波都无问题，今时就梗喺唔同往日，热死辣辣两个几钟食餐饭真喺有啲受罪。买咁多靓海鲜嚟，点知食得咁无瘾 ，上次年初嘅死佬蛇宴酒楼发生好多「虾碌」嘢，个经理醒目识补镬先令各大佬无咁多怨气，今匀容龙咁大镬几个经理都可以当无事发生咁，危机处理喺零 。
张贴
