西苑酒家 (太古城中心)

营业中

休息中

我去过西苑食饭两次，一次在两年前向铜锣湾分店一尝闻名已久嘅叉烧；另一次就向呢间食午市点心。西苑嘅叉烧果然系名不虚传，用上半肥瘦,，一层肥夹著一层瘦肉，烧嘅火喉啱啱好，令瘦肉充分吸收因热力从肥糕渗出嘅脂肪，加上面层涂上嘅特制酱汁，食落除咗有口感之外，仲令到齿颊留香，令我食完一件又一件，价钱又唔贵。诚如传闻中所讲，食叉烧一定要去西苑。我带著呢份冀盼，向上星期六去太古城分店饮茶，结果令我好失望。点心款式唔够美心集团嘅多，唔紧要，食嘢唔系食款，好食嘅三数款已经足够。可惜，点心味道普通，不过用料尚算新鲜(起码我食完虾饺冇皮肤敏感)。瑶柱蛋白炒饭都炒得不错，够干身。最大问题系埋单，一行八个人，食嘅嘢十分普通，竟然超过一千银。虽然系有人请，但我都替佢肉痛。总括嚟讲，毁誉参半，实在好难俾分，唯有维持中性立场。