花臣車仔麵 (已結業)

今年嘅母亲节好特别，中菜、西餐、日本菜我哋都冇食，而我就带咗妈咪去食好地道，好香港嘅「车仔面」！今次嚟到位于旺角嘅「花臣车仔面」，原来佢嘅花臣都几多，净系车仔面配料都有超过50款，啱哂咁贪心嘅我！我一共叫咗15款配料，有柱候牛腩、猪软骨、牛展、炸虾饼、墨汁墨鱼饼、日式叉烧、猪皮、腐皮墨鱼条、鱼皮饺、鱼片头、紫菜、芝心丸、咖哩鱼蛋、玉子蛋、巨型蟹棒，再加腩汁！其中牛腩同猪软骨真系好好食，牛腩好稔好入味；猪软骨炆到软硬适中，虾饼同墨鱼饼都好出色，前者入面有两只虾仔；后者好烟韧，黑色好特别。猪皮好爽，又冇毛；个腐皮墨鱼条炸到好脆口；鱼皮饺食得出系四海做嘅；仲有个好特别嘅超长蟹棒，小朋友见到一定好开心呀！至于妈咪就叫咗11款配料，其中佢话牛孖根、牛肚同黑牛柏叶好正，牛根有嚼口；牛肚又稔又入味；牛柏叶好爽口，整体佢非常满意！我哋仲一人叫咗一大支支装可乐，爽呀！今年嘅母亲节非常特别，有住香港人嘅集体回忆，同我未试过两个人食车仔面，食咗$327！妈咪，母亲节快乐，多谢你，我爱你！