君悅咖啡廳

营业中

休息中

今次系第三次去食dinner buffet，因为庆祝生日，所以好想食！上一次食已经系2016年，隔咗几年再去，质素依然令人满意。我哋坐喺近窗位置，唔近食物枱，但我觉得都ok，个景开扬啲。6:30pm去到都唔多人，但坐坐吓就已经满坐，所以就算平日去都系订位先隐阵。我哋第一样去攞嘅就系烧鹅同海南鸡，因为男朋友记得佢嘅烧鹅髀系有限供应，所以一定要去攞左先。我就拎咗海南鸡饭加3件烧鹅髀，厨师将烧鹅放落个炉道热一热先再俾我。烧鹅有啲肥，都几香，但皮唔脆。海南鸡系滑嘅，如果油饭再香d就更好食。之后就开始食冻海鲜，龙虾正常，青口好大只，几嫩滑。刺身我话每款都要，厨师俾咗每款三片，好多！全部都几好食😋。当晚嘅炖汤系党参炖乌鸡，好甘甜，好饮。最好食系鹅肝多士，每块鹅肝有成8cm左右咁厚，口感嫩滑，夹埋件甜梨食，超正，食咗两件。😋😋烧牛肉就个边干咗，中间位都嫩嘅。甜品我饮咗碗雪耳雪梨糖水同埋食咗件榛子拿破仑，两样都唔错。最后侍应捧上生日蛋糕，细细件外型唔算好出色但胜在朱古力mousse好香滑。熟食隔离仲有柠檬茶可以任饮，茶味够浓。全晚食物总括嚟讲都好食，系我个人最钟意嘅自助餐餐厅。