西關粥品 (已結業)

西关粥品真系好难食到，难得天黑前喺元朗，又系非繁忙时间，专登喺西铁站行过去食，都要行10几分钟。嗌一个春菜陈肾咸猪骨粥先。其实佢嘅粥系有好多𩠌拣嘅，由呢啲经典款到蕃茄粥、粟米木耳呢啲比较少机会食到嘅都有。咁点解要食经典款呢？因为第一次黎，唔可以唔试招牌货先嘅。简直系一试爱上啦。粥底够绵，又够杰。猪骨大细适中容易食，又足料又够咸。其实间舖头系好多酱料嘅，菜甫都好似有两款，但根本完全唔驶落任何野送粥。有冇野可以弹呢？有嘅，啲陈肾有轻微嘅腥味，但绝对系瑕不掩瑜。难得黎到，就算饱都要叫多样野试嘅，本来好想试吓佢好出名嘅「煎」咸肉糭，但见隔离台碟肠粉好靓，最后嗌咗个窝蛋碎牛肠，都好少见架。肠粉即叫即做，热辣辣，啲皮薄到透到入面嘅馅料出黎，若隐若现，性感，好食，饱满，丰富。有冇野可以弹呢？有嘅，只窝蛋唔系好食得出。埋单先60蚊，非常满足。