桃園制作粥麵餐廳 (彩雲商場)

营业中

休息中

住彩云的朋友成日话呢间好食，今日行过又真系好多人等位，咁又肚饿唔想揾就等一等呢间试下。比想像中快有位，侍应好快手执枱安排一行三人坐卡位，啲待应超忙好明显唔够人手阴功。见到menu有客饭套餐几抵食又饭又例汤咁，（但系我8点几食都已经几款都卖晒）有啲小菜加廿蚊另包饭同汤。咁呢见到小炒王我一定叫下人地招牌野既，呢间系XO酱韭菜花炒鱿鱼圈加啲杂荟炒成既，略略多油左，但镬气够既。妹重口味就叫左个猪膶鸡球煲⋯⋯仲多油，鸡唔会系新鲜既都预左，配料多既有啲青红黄椒洋葱同蒜头，有啲咸，要𩠌饭，本来叫set但汤卖晒就只能斋叫靓仔，呢度啲靓仔有啲黑点开头心惊惊以为谷牛，原来加左啲藜麦几健康下。叫返个浓汤野菌鲜竹菜苗清清地湿湿口。其实三𩠌两饭加饮品，虽然加一都系二百蚊又唔算贵又有冷气又食到小炒，咁一定抢左隔离好彩酒楼啲生意，要茶介加一已经一碟小菜价钱。