小火山 (已結業)

最近放假，朋友约咗我嚟呢间小火山食晚餐，嚟到听朋友介绍原来呢度系食Mookata嘅，Mookata系一种结合烧烤同火锅嘅泰式料理。当然除咗烧烤同打边炉，呢度都仲有好多其他款式嘅食物可以选择。我哋当晚叫咗三味刺身一口杯盛合做前菜，三味包括有生蚝、三文鱼同泰式生虾，每款刺身都用一个小小嘅玻璃杯装住，入面仲有一啲酸酸甜甜嘅酱汁，望落好精美，食落又好开胃。 食完前菜之后当然唔少得就系开始食Mookata,打边炉嘅汤底，我哋就拣咗香茅椰汁鸡汤同牛骨船汤，两款汤底都好香好浓郁，啱晒打边炉。另外，当然唔少得嘅就系打边炉同烧烤嘅食材，我哋叫咗一个小火山经典泰猪锅拼盘，入边有四款唔同部位嘅猪肉，每款猪肉都好新鲜，质量好好👍🏻 另外，我哋仲叫咗一份泰式猪梅花肉片，入边有两片好大块嘅猪梅花肉，呢两片梅花肉有经过特别嘅腌制，烧完都好鲜嫩多汁🤤除咗烧肉，我哋仲叫咗一啲金边粉同菜用嚟打边炉，质素都唔错！最后值得一赞嘅就系饮品，好少餐厅会真系用原个西瓜去装西瓜沙冰，除咗个样好有睇头，饮落仲好清甜，超级解渴👍🏻Ps: 呢度夜晚七点至九点都会有live band表演，客人仲可以点歌，超正🥳🥳🥳