洛奇冰室 (已結業)

#我可能要食晒所有茶记嘅常餐每间茶记嘅常餐都有佢自己嘅特色，虽说离不开都系面同火腿蛋牛油多士嘅配搭，但细看之下，其实当中有多重选择，甚至偶有惊喜，就系点解我钟意食常餐嘅原因。首先喺面方面，个人来说，我钟意叫沙嗲牛肉、五香肉丁或榨菜肉丝，但我曾经食过有呢间嘅雪菜肉丝几够咸味，所以偶尔会宠幸佢。而且有时知道边间嘅沙嗲牛肉比较淡味或较稀，我就会转会食其他。不过，每次叫沙嗲牛肉或者五香肉丁，总系唔食入面嘅肉，只系享用肉汁带来嘅滋味，好古怪吧？除咗面嘅配料，对于面条本身嘅软硬度，我都比较腌尖，每次落单都会讲声：「面要生啲呀，唔该！」系，我系唔钟意食软林林嘅面，呢啲真系好讲个人口味。至于喺多士方面，无论系火腿蛋或者肠仔蛋，我都会食，只系通常会选择全熟蛋，因为有时如果块多士唔够脆口，点蛋汁会令口感好恶心。所以面包系重要一环，就好似我今次食呢个，只系用上白面包，然后轻轻烘一烘，连包皮边都送埋畀我，我就真系觉得一般。曾食过一啲茶记，佢哋嘅多士系用上厚多士配蒜蓉牛油，仲大大力一烘，微微见到㶶边，味道一绝。当然，大部份茶记都系用上普通白面包，有时连烘都冇或者要加钱烘，我仍然会欣然接受，如果其他嘢都合格的话。