冬蔭公公 (已結業)

路过连城未食午餐，一楼好多好野食，今日就拣左冬荫公公， 贪佢夏日炎炎泰国嘢食就最开胃， 两点开始岩岩好有下午茶餐， 比普通午餐平， 但来到份量都唔细㖞， 叫咗个海南鸡饭， 饭有淡淡姜味， 好香配黄油鸡岩岩好， 酱料配有三款， 一款姜蓉， 一款泰式酸辣 同一款甜酱油， 我最buy佢中间个甜酸酱， 蒜蓉够香， 又醒胃， 配埋个冬瓜汤消暑一流。个鸡唔够食，另外再叫咗个凤爪， 超级推介， 凤爪腌到好入味， 配埋香茅 同各种香料，甜甜酸酸 有少少辣， 又系一道夏日美食， 胃口大开， 唔经唔觉就比平时食多咗。仲有杯拉茶， 同港式奶茶唔同冇咁重茶涩味， 好香奶味 反而有少少似台式奶茶。另外再叫咗个串烧， 牛肉略嫌有啲硬， 鸡肉就好嫩， 洒咗啲泰式香草， 好香，但个沙爹酱就偏甜，我比较钟意就咁食唔点酱。仲有个木瓜沙律， 佢张菜单有两个辣椒我仲以为好辣 ， 好在来到 都唔算辣， 青木瓜配埋d酸辣汁，拎嚟消食就啱好好。下次再嚟想试埋个冬阴功汤面， 貌似唔怕太辣。