新蒲坊 (已結業)

沙田市中心呢边都冇乜小食店，新蒲坊算系其中一间，亦喺沙田经营左好多年。细细嘅舖位孕育咗好多人嘅集体回忆。以前串烧只需要6蚊，慢慢、慢慢变到而家10蚊一串，所以都唔系成日黎食。今日喺沙田拍下拖嘅时候就去买几串串烧黎咬下。等候嘅人相当多，但舖头好细，而且冇明显嘅队比人去排，所以呢如果客人谂好叫咩就要比啲勇气上前同啲姐姐讲食乜，因为有好多人都系等紧野食或者谂紧食乜。多数人黎呢度都系食串烧，不过呢度其实都有车仔面，但我就从来都冇食过。呢度有几种串烧，鸡肉、猪颈肉、牛肉、司华力肠、烟肉等等，你谂得出嘅都有架喇。谂定就快啲嗌喇，因为都好多人叫等一段时间架！呢度系即叫即烧嘅，好佩服啲姐姐系𠮶热热嘅火炉前烧咁耐。今次叫左猪颈肉同鸡肉，等左大约5分钟左右，点埋呢度特制嘅蜜糖酱同沙嗲酱就食得喇！串烧用发泡胶盘仔装住，如果净系叫一串嘅话系唔会提供盘仔嘅。客人都系企喺度食嘅，行出啲就系沙田公园，有啲人都会拎落去坐喺度慢慢食嘅。𠮶两只酱又系百搭嘅，点咩都咁好食。猪颈肉一如以往咁爽口，有咬口之余又唔会太un，而且肉汁好juicy，而鸡肉就好嫩滑，而且多肉，味道就好似BBQ咁样，好香，好想食多几旧。