Chilli Lime (形點 I)

营业中

休息中

一个人无无聊聊咁行下YOHO，发现原来有一区域有好几间食肆，有日式餐厅、日式火锅、西式餐厅、台式餐厅、多国菜餐厅（以泰国菜为主），最后拣左食泰菜。我不太喜欢食肥腻嘢，所以拣左三款清淡嘅菜 (头盘、主菜、甜品)。我嘅头盘系泰式柚子鲜虾沙律 ........ um 好味道，柚子有少少苦涩味，但酸酸甜甜嘅汁平衡返啲苦涩味，拌入鲜虾、花生、炸椰子丝、炸蒜丝、葱粒、红葱头，食起来好醒胃，味道好多层次，做头盘一流。我嘅主菜系越式软壳蟹米纸卷 ........ 透光轻薄嘅米纸卷包著咸香酥脆嘅软壳蟹，配上牛油果、蟹子、沙律菜、甘笋条、青瓜条，唔洗点酱食都觉得好美味，因为啲材料好新鲜，所以食到食物本身嘅鲜甜既健康。我嘅甜品系椰丝班兰丸子布甸 ........ 第一次食班兰布甸，造型好特别，系一个暖食嘅甜品，不太甜，好啱我口味，一粒粒绿色嘅班兰西米粒搓成一个大波波，口感烟烟靭靭，再以新鲜椰丝条包住，一口咬下满满嘅椰香，上面铺满一丝一丝嘅甘笋丝，非常吸晴。