榮華南洋冰室

营业中

休息中

今朝要返公司，既然出咗嚟，下昼就去上环逛下，我俾呢间蓝色嘅大厦吸引咗，就食个南洋午餐啦。店员推介海南鸡髀饭，或者蒜炒牛柳粒饭，我特别想食一啲香口啲嘅嘢，所以拣咗蒜炒牛柳粒饭。平时食开嘅牛柳粒饭都会配薯仔，但系呢一度系配豆泡，感觉健康啲。本身牛柳粒都煮得好入味，而且仲加咗好多洋葱、红椒同青椒去吊味，辣辣地味道更突出。我追加咗个小食，系凤尾虾越式春卷，都系几有特色㗎，外面系几层脆皮，包住入面嘅虾肉，再配以甜酱食，唔错嘅选择。咁多样浓味，而且煎炸嘅食物，最好饮番啲冻嘢，中和一下。见佢有泰式咖啡，就叫一杯嚟试吓，点知一嚟就嚟三只杯。原因系咖啡同埋花奶炼奶分开上，咖啡喺咖啡壶入面焗5分钟之后（如果想浓啲咖啡味可以焗耐啲），再倒入炼奶同花奶，搅匀佢，如果想甜啲就可以搅匀得耐少少，将沈喺底嘅花奶同炼奶都融入咖啡入面。因为我系叫冻饮，所以最后嘅步骤就系将搅匀嘅咖啡，倒入放咗冰嘅杯入面令佢成为冻饮。泰式咖啡非常之好味，最好嘅系我可以自己调节自己钟意嘅浓度同埋甜度，过程好有趣新鲜。