Orange Elephant Thai Restaurant (利奧坊) (已結業)

好耐冇见嘅大角咀朋友约我食饭，我哋就选址Orange Elephant Thai Restaurant。呢度做紧推广，每日都有$1指定菜式，真系好抵！食泰国菜当然要食泰式拼盘，可以一次过满足晒几个愿望。炸虾饼大大件又够弹牙，就算唔食拼盘都一定要食佢。春卷外皮脆卜卜，入面嘅馅料都好食。鱼饼就比较浓味，充满泰国嘅味道。香叶包鸡嘅鸡肉几嫩滑，仲带有香叶嘅味道。每逢见到咖喱包都忍唔住要叫返一份，呢个咖喱海鲜脆包盅有满泻嘅咖喱汁。入面有好多唔同嘅海鲜，大虾、青口、鱿鱼等，配埋又甜又香嘅咖喱真系好食。另外仲拣咗椰青焗海鲜饭，厚厚嘅椰浆淋喺焗海鲜饭上，捞饭一流。焗饭入面就好多配料，除咗海鲜，仲有烘得香口嘅椰丝、腰果等，够哂丰富。最后嗌多两杯冻饮，珍多冰同泰式奶茶饮完更加透心凉。