薄荷葉泰國菜

营业中

休息中

餐厅充满泰式风情，环境好有身处泰国渡假嘅感觉。店内挂满民族色彩嘅灯饰及泰象布料，无论灯饰抑或摆设都各具特色！餐厅不时播放住泰国嘅流行音乐，气氛相当唔错。餐厅以自家农地去种植有机蔬果及香料，保证食材新鲜有质素仲符合环保嘅原则！而食物则由泰籍厨师主理，确保风味正宗。餐牌上有好多唔同嘅菜式选择，有小食、头盘、沙律、海鲜、汤、蔬菜、套餐同饮品等等...今次叫咗四样食物，落完单之后店员会根据你叫嘅菜式送上唔同款式嘅酱料，然后再系上菜时提点你要用边一款酱料，认真细心。炸虾球外皮炸到金黄酥脆，虾胶爽口弹牙又有鲜味，点上甜酸辣酱一齐食，味道唔错。马拉盏炒通菜马拉盏配上辣椒丝同蒜蓉嚟炒，够哂镬气，通菜爽嫩，风味十足。特色菠萝饭以木桶上，份量好多，炒饭上面铺满肉松，炒饭入面有虾、鱿鱼须、鱿鱼圈、腰果、提子干、粟米及青豆等等...口感丰富。招牌火焰烧鸡鸡腌得入味之余卖相又好特别，外层烧得够香口。上菜时店员会喺鸡身上淋上酒然后点火，感觉好有特色，名副其实 "火焰烧鸡"。最后叫咗杯可乐同一个椰青，椰青饮落去好清甜，椰肉亦都好食。