SAYAM Thai/Bar (已結業)

朋友最钟意搜罗各区优质小店美食，今日就带咗我去到位于铜锣湾嘅ŚAYĀM。从大街走到小巷，再搭升降机，就发掘到呢一间充满特色嘅泰国餐厅。餐厅以蓝色作主调，非常有情调，就算唔饮酒坐喺入面都有微微嘅醉意。呢度嘅食物选择未算丰富，但以小店来讲都已经相当出色。配合返咁Chill嘅环境，当然要叫返两杯饮品，呢杯Chiang Mai Darling系橙汁、桃、红莓嘅结合，甜中带微酸，充满热带感觉。Virgin Thaijito就系荔枝、青柠、薄荷梳打，最适合炎炎夏日饮番杯。小食拼盘有春卷、虾饼、鸡肉卷、单骨鸡翼、炸鱿鱼须同泰式青芒果沙律，仲会配上辣椒酱同泰式辣汁，份量相当多，绝对值回票价。大虾冬阴功炒饭味道香口，唔算太辣，好啱香港人口味，而且大大只大虾放喺饭面，非常之有气势。椰菜苗可以选择以虾酱、辣酱、蒜蓉、马拉盏拌炒，而我就拣咗虾酱，啖啖充满咸香。呢度真系好适合约朋友嚟饭聚，无论三五知己定大班朋友都咁啱feel。