小田田主題餐廳 (已結業)

圣诞节当然系同男朋友去撑枱脚，原来约左旺角，但好食既又劲多人，唔好食既又唔想食，所以最后转去太子揾食。太子出名多小店，今晚我地就拣左呢间装修都几靓既小田田餐厅，食番个西餐应下节，浪漫一下。我地点左个Little Farm 套餐同牛柳粒南瓜意大利饭Set。首先黎左两个汤，一个龙虾忌廉汤、一个磨菇汤，两款都好浓味，蘑菇汤仲好有口感，食到粒粒蘑菇。沙律都唔错，有烟肉碎同火腿。之后到牛柳粒南瓜意大利饭，牛柳粒有安格斯质素，入口重牛肉味，意大利饭略嫌唔够硬身，但南瓜蘑菇汁就好juicy，好夹。之后到头盘芝士焗韩国生蚝拼虎虾，虎虾好大只，食落好爽身，焗蚝都好新鲜，芝士烟肉同焗蚝意认真绝配。推介。然后到主菜，鹅肝配bb火鸡，喜欢鹅肝既我好满意，入口即溶，外脆内软，好香口。而bb火鸡同烧春鸡好似，肉汁好多，肉质都嫩滑。最后系甜品，我地拣左紫薯心太软，好特别，浓浓紫薯味同有流心，再配有少少酒味既雪糕，绝配！整体服务都好满意，好亲切。