人和月雞煲火鍋店 (已結業)

餐厅环境宽敞舒适，近窗边嘅系六人卡座，地方相当整洁。调味料区域应有尽有，雪柜亦都有无限量嘅饮品供应，比较特别嘅系餐厅会有自家制洛神花茶、菊花露等一类饮品，够哂健康。呢度嘅食法有别于一般嘅任砌打边炉，首先会嚟个头盘，可以拣鸡煲或者酸菜鱼，之后会再换过个汤底打边炉，唔会好似出面咁就咁加汤，沟到个味道淡哂，有鸡煲又有火锅，一次过满足哂两个愿望。前菜鸡煲拣咗韩式芝士鸡锅，味道酸甜平衡，加上面头有海量嘅芝士覆盖，绝对唔比城中有名嘅韩式烤鸡餐厅逊色。药膳养生牛奶锅，食完鸡煲之后就开始转汤底打边炉，汤底呈奶白色，香气非常诱人，药膳味道浓重，睇嚟相当滋补。点菜后侍应先送上一盘靓牛肉，分别系高级雪花肥牛、严选牛下肩、牛板腱、精选金钱展同埋特级牛胸爽，其中雪花肥牛油脂丰富，牛下肩同牛板腱有好重嘅牛尾，牛胸爽口感特别，值得一试。另外火锅料里面比较出色嘅系鲜虾同埋粟米饺，前者爽口弹牙重任叫任食，后者内馅饱满，令人非常满足。