漁不老烤魚雞煲火鍋 (諾士佛臺) (已結業)

朋友推荐尖沙咀诺士佛台-渔不老烤鱼鸡煲火锅，好食又抵食，于是就去开餐。拣咗二人套餐，星期日至四$348/位，星期五、六及公众假期就$388/位，另茶介$10/位及加一。前菜选咗炸虾卷同麻辣猪耳，炸虾卷即叫即炸，外面腐皮系脆口架，虾肉实净又弹牙，一定要食；麻辣猪耳少少麻少少辣，爽脆又入味，好正。酸菜鱼，上枱真系吓亲，劲大盘咯，鱼片份量多又嫩滑，配菜仲多，食极都有，包括豆卜、黄芽白、酸菜同海带，拣咗微辣，个汤酸酸地，越食越开胃。药膳鸡煲，汤底药材丰富，放入半只醉鸡，等5分钟就有得食，先盛一碗汤品尝，药材味很浓郁，鸡肉嫩滑，真心唔错，食完鸡肉仲可打边炉。另外，套餐固定配有时令海鲜拼盘，款款都好新鲜；顶级黑毛猪卷+极上骟牯牛拼盘，黑毛猪肥瘦适中，牛肉软滑兼牛味极香浓，渌两下就食得；墨丸、水饺、蒿荀、蔬果篮，全部都新鲜好味，套餐绝对丰富兼抵食。座位阔落，店员好贴心，换碟快，朋友真系无介绍错。