小滿定律

营业中

休息中

讲到西贡食雪糕，最近真系少不了「小满定律」。呢间店舖就系位于小巴总站附近，行经7-11同百佳中间条直路就会见到。讲到小满定律呢度既特色，就系佢哋卖紧既系希腊乳酪froyo，佢既希腊乳酪唔似一般咁酸同杰，口感滑身易入口，基本上同我哋平时食开既希腊乳酪比，仲容易接受啲。我𠮶次试左希腊乳酪雪糕既杯装，价钱系$58，份量都几够，200克雪糕加上可以拣三款配料同一款酱汁，配料选择都好丰富，有二十几款可以拣，酱汁就有四款畀你配搭。我拣左绿茶粒糯米糍、咖啡蒟蒻同焦糖脆脆，焦糖脆脆当时未整好，店员好贴心地另上比我。酱汁方面，我拣左热情果酱，佢系用新鲜热情果打成酱，仲见到啲热情果籽，酸酸甜甜，非常醒胃。讲返配料，绿茶粒糯米糍既口感好正，糯米糍外皮软糯，糯米粒几有弹性，不过绿茶味有少少怪味，个人感觉唔系太啱口味，如果原味会好啲。咖啡蒟蒻方面就中规中矩，冇乜特别惊喜，纯粹加左啲Q弹口感。至于焦糖脆脆，口感好脆，仲可以平衡到乳酪既酸味，同雪糕一齐食真系几夹。整体嚟讲，小满定律既希腊乳酪froyo真系值得一试，食完又冇咁重既负担，配料同酱汁既选择多元化。如果你去西贡，一定要试下呢度既希腊乳酪雪糕！