誠記

营业中

休息中

自从有沙嗲牛肉面关注组之后，久唔久都望下啲会员有咩推介。多数都系推新界九龙区嘅餐厅，而港岛区就只有呢一间诚记。星期六下午嚟到都等咗几分钟先有位。睇餐牌净系粉面都好多选择，而我地一心谂住嚟食沙嗲牛肉面，所以就叫咗两碗沙嗲牛肉面，两块炸猪扒 同埋两杯冻柠茶。呢度个沙嗲牛肉面只系$27 ，真系好平！不过饮品就另外散叫。沙嗲牛肉面系成碗汤都系沙嗲汤，令我谂起我好钟意食嘅永顺食店。沙嗲汤好香浓带微辣而且唔会太咸，但唔系好大阵花生味。牛肉有牛味唔会一阵苏打粉腌过嘅味而且食落唔鞋，份量方面畀得好慷慨，约有8-9块，估唔到呢个价钱都有咁多牛肉。炸猪扒 (两块$22)炸猪扒系无炸粉嘅类型，所以系脆嘅，但肉质软腍又唔会好油腻。本来想食埋西多士做甜品，不过食完碗面同炸猪扒都饱咗，唯有下次再嚟食啦。