港 (已結業)

有一段时间无咩点去试新野，今次就放工近近地系湾仔试下一间港式fusion菜为主既酒吧，见到个餐牌个时，好多野都想试，但怕叫太多会浪费食物。一行两个人，每人叫左杯野饮，分别系Mama Mia同BPJ: Cox Apple，我饮个杯系Mama Mia，应该系以西瓜同米酒整出黎既cocktail，果皮味好香容易入口。我地主要叫左啲小食类为主既食物，可以慢慢倾计慢慢食，分别系炸鸡皮、莲藕片同话梅乳猪。本人就对鸡皮特别有爱，而今次既炸鸡皮炸得干身唔油腻，个酱就似BBQ味做胆再加啲特别味入去，同炸鸡皮好夹。莲藕片炸到有啲似蔬菜薯片，上面有个甜甜地咸咸地既酱，我觉得就系腐乳为主整出黎既酱，个酱同莲藕片都好夹。最后就系话梅乳猪，先讲配角，个薯蓉好滑软绵程度啱啱好，有食开中式烧肉既应该都知话梅同乳猪系一个好好既配搭，所以主要系睇个酱，酱既质感口感味道都非常好，真系无得输，而乳猪皮脆肉嫩猪味十足，个份量两个人食啱啱好。整体感觉良好，菜式到饮品都有新意，特别系个话梅乳猪好出色，送酒一流。