人生有限杯.串燒店

营业中

休息中

最近登龙街开咗间新店，主打多款特色串烧，当中加入唔少港式Fusion料理，而且最平$10就有交易！店内座位唔多，晚上到访一定要预先留位，用餐时间两小时，食物即叫即烧，份量适中，适合约朋友仔上嚟吹水啤一啤🍻肉类款色众多，大葱鸡肉大块啖啖肉、鸡中翼烧至外脆内嫩、松阪猪同五花腩肉油脂感满满，肉味突出，令人一试难忘、鸡脚筋比较少见，带咬口，洒满调味粉十分惹味，值得一试。仲有烧翠玉瓜、蒜蓉菜脯烧茄子同蜜糖烧菠萝，食返啲菜降低油腻感。另外私心推介豚肉卷，咸香口味，里面包住唔同馅料，有车厘茄、荔枝、麻薯、鹌鹑蛋、黑松露金菇等，可以按个人喜好选择，车厘茄同荔枝咬落爆汁且十分开胃、麻薯QQ哋、鹌鹑蛋蛋味出、金菇带丝丝口感，性价比高。小食有老油条酿墨鱼滑爆芝士，四小粒，炸至外脆，淡淡芝士香气，点埋蜜糖好好食。主食方面大大力推介咖喱牛舌菠萝包，外皮超脆超甜，牛舌厚切但入口即化，配埋煎蛋真系不得之了。香葱手抓饼都唔错，四大片，热辣辣，外层够薄，香葱又香又咸，食埋就啱啱好够饱。