脆味批

营业中

休息中

由九龙塘赶入荃湾中心，皆因约咗旧同事F聚旧，呢度佢地头食咩佢话事。店内格局略胜快餐店，干净企理坐位祇有24个，未够1点尚有7成吉位，有几个等外卖嘅人，F未到坐低睇吓有咩食。午餐时段有几款选择，主菜 +炸鸡1件/薄饼 + 汤/汽水。突然间好多学生涌进来，好快满坐，迟啲都无位。唔想食意粉拣饭，拣夏威夷猪柳焗饭，唔知咩味，试吓无防。虽然店仔细细，坐满人都唔觉迫夹，坐玻璃窗旁仍有悠闲感。粟米汤浓稠适中，汤面有些香草点缀，欣赏佢唔马虎，赞！味道唔错。炸鸡膇外皮脆脆，粉浆唔厚啱哂我，口感嫩滑有肉汁，好味。夏威夷猪柳焗饭猪柳很腍，食味多酸少甜，不是我杯茶。除咗是日午餐，原来仲有是日套餐，F拣咗开心套餐，有炸鸡、薄饼、炸洋葱圈、炸薯角、汤/汽水又几吸引㖞。薄饼涨卜卜样子可爱，面头铺满料和芝士，睇见都流口水，F话OK好食呀。试咗一件炸薯角，外脆内软又惹味，正！唔怪之得系F至爱啦。