影片
更多
2014-01-17
5896 浏览
Happy Friday!!! 早2日收到之前用信用卡帮朋友预订的SoftHard演唱会门票, 急不及待要出来进行交收...朋友为答谢我, 今餐佢请, 咁我唔客气啦, 呵呵呵呵...揾咗韩国烧烤、日本烧烤、同上海菜比朋友拣, 佢样样都想食, 最后拣日本烧烤, 点知订好晒位间日本餐厅先打返转头话得水吧位仲要限食1.5小时, 即系迫我地去韩国烧烤啦, 虽然大家同样都系限食1.5小时...订咗7:00pm, 我地6:45pm就去到... 门口已经企咗好多人, 不过似系排紧隔离间台式Cafe... 朋友一马当先, 叫都叫唔住... 唏, 你入咗镜啦, 哈哈...大家还记得2005年12月中, 香港主办世界贸易组织第六次部长级会议，约2000名韩国农民来到香港示威的情况吗?!! 当时杂志访问在维园扎营的韩农, 报导指韩雅林系全港最地道的韩国餐馆, 连来港示威的韩国农民都系帮衬佢... 我睇完报导后都即时来一试, 印象中系几好味&几贵&真系太地道唔系好啱我口味... 当年仲未开Blog, 无记录可以睇返...原来餐厅门口个招牌都系得韩文无中文... 好韩呀!!!我地被安排坐2人卡位, 都几舒服,
朋友为答谢我, 今餐佢请, 咁我唔客气啦, 呵呵呵呵...
揾咗韩国烧烤、日本烧烤、同上海菜比朋友拣, 佢样样都想食, 最后拣日本烧烤, 点知订好晒位间日本餐厅先打返转头话得水吧位仲要限食1.5小时, 即系迫我地去韩国烧烤啦, 虽然大家同样都系限食1.5小时...
订咗7:00pm, 我地6:45pm就去到... 门口已经企咗好多人, 不过似系排紧隔离间台式Cafe... 朋友一马当先, 叫都叫唔住... 唏, 你入咗镜啦, 哈哈...
大家还记得2005年12月中, 香港主办世界贸易组织第六次部长级会议，约2000名韩国农民来到香港示威的情况吗?!! 当时杂志访问在维园扎营的韩农, 报导指韩雅林系全港最地道的韩国餐馆, 连来港示威的韩国农民都系帮衬佢... 我睇完报导后都即时来一试, 印象中系几好味&几贵&真系太地道唔系好啱我口味... 当年仲未开Blog, 无记录可以睇返...
原来餐厅门口个招牌都系得韩文无中文... 好韩呀!!!
我地被安排坐2人卡位, 都几舒服, 系张枱面细咗少少啰... 间餐厅唔系好大, 装饰非常简约, 如果唔系有个炉系枱面, 都几似茶餐厅, 哈哈...
限时1.5小时, 要烧烤的话时间实在不足够, 还是点些可以即食的吧...奉上前菜的一刻, 系食韩国菜最感兴奋的环节... 每间餐厅每天的前菜款式均有不同, 2个人有8碟前菜, 太好了... 卖相看似平平无奇, 甚至有点倒胃口, 吃进口中却又是另一回事... 眼前看到最近的绿色菜最不堪入目, 竟然非常美味, 只系用面豉酱捞一捞, 即成美味上菜... 右边的鱼板好辣,但好美味... 再上少少的蔬菜煎饼, 有工序的呀, 不是随随便便一片腌菜... 左上的甜薯仔都好好味, 单吃前菜已够忙了...
席间谈及韩国饮食节目滋味行, 我今晚主持上身呀, 哈哈哈...海鲜辣炒韩式年糕 $160
-- 好多料咁㖞.... 青口、蚬、鱼板、虾... 先试年糕... 哗!!!!!! 少辣都好辣呀!!! 年糕烟韧有弹性, 蘸劲多酱仲好食, 又香又辣, 好好味, 食得好过瘾... 青口同蚬肉都几有弹性, 虾仔就差咗少少, 肉质松散... 鱼板都好味...
回到家中, 刚巧还看到最后数分钟滋味行, 主持人金成恩劲赞节目入面间餐厅好味, 佢举出3大要素 : 湿、辣、甜... 原来系韩国人心目中, 呢3个元素系咁重要嘅, 我今晚亲身体验到...事缘呢... 用来舀年糕的铁匙沾满酱汁, 咁我想用来舀海鲜锅的汤来饮, 我笑笑口咁话放个铁匙落海鲜锅洗干净, 朋友当然唔比, 最后我用咗最原始的方法, 放入口吮干净... 哗!!! 好好味呀!!! 个年糕酱已经又冻又杰, 但系甜味比刚才热辣辣时突出咗好多, 辣味依然劲, 有齐湿、辣、甜3大要素...
香脆泡菜煎饼 $100
-- 放低咗一阵先食, 都仲好热, 放入口一咬, 我即时滋味行主持上身, 4份1个煎饼含住系口, 瞳孔放大, 大声讲 : "哗, 好脆呀!!!", 哈哈, 其实自己都听唔明自己讲咩, 朋友笑到肚痛, 话我个表情学到滋味行主持十足十... 表面煎得好香脆, 够干身, 泡菜少少辣, 好好味...
香辣海鲜锅 $420-- 全晚最大的挑战!!! 落单时都无考虑过个锅有几大, 上枱时真系有WoW咗出来... 花蟹同大虾同元贝都系坚大只, 八爪鱼脚又粗又大... 而家见到的只系表面, 无谂过最后会食唔晒... 隔离左右刚坐低刚/未落单的客人, 纷纷揾店员了解, 有4人行的游客仲企埋起身望, 好似即时改埋Order...
有大辣、中辣、小辣、无辣选择, 我地选了少辣, 好彩今次真系少辣... 上桌后盖上锅盖滚一会, 蟹壳同虾壳的颜色已转红, 店员开盖帮忙剪开八爪鱼脚...
只花蟹坚巨型... 肉质鲜嫩, 蟹膏较少...
大虾都坚巨型... 虾肉唔系霉的, OK有弹性... 八爪鱼脚好弹牙, 一点也不韧... 青口都有弹性...
巨型元贝好鲜味, 肉质柔软有弹性... 洋葱滚到半透明, 好甜, 我食咗大半个...
个锅入面原来仲有好多材料... 大大旧鱼... 虾仔就唔得喇, 肉质松散...
仲有好多材料, 有蚬、豆芽、鸡脾菇、红萝卜、脆肉瓜、绿色蔬茶、金菇...
大家千祈唔好剩系挂住食𩠌, 忽略咗个汤!!! 个汤简直鲜味到爆灯... 我地狂舀来饮啰... 如果唔系之前食咗年糕同煎饼填饱晒个肚, 真系好想叫碗白饭倒落个汤度捞来食, 如果可以打只蛋就更Perfect!!!香辣海鲜锅材料实在太太太丰富喇, 我地2个人食极都食唔完... 食咗好耐好耐好耐... 经理开始走过来赶客, 佢个头系望住大门讲"时间都差唔多", 跟手熄咗我地个炉, 走咗去, 我觉得好无礼貌啰, 同人讲说话唔望人...
同埋我地唔系斋吹水无帮衬, 2个女仔食咗$750, 都唔算平啦, 又唔系挂住讲唔食, 我地系不停好努力地食食食...
过咗一阵经理又走过来, 要我地埋咗张单, 仲问我地个锅入面食剩的需唔需要打包... 打包咗就唔好食啦, 同埋其实比多少少时间我地, 我地可以食得晒啰, 我地真系唔想浪费食物啰... 超级扫兴!!!
我都知系限食1.5小时, 所以已经专登唔食烤肉, 惊又烧又食好赶食唔切... 估唔到食熟食都会搞到咁... 朋友同我都超级扫兴...
店员9秒9清枱, 连生果都无, 香口胶都无片, 扣晒分...
行到出门口, 塞满等位的人, 眼神好重怨气!!!
张贴
