Lab Eat Bistro (豉油街) (已結業)

想试Lab Eat Bistro好耐，今日老公终于肯同我嚟，一于食尽佢！前菜拣咗西班牙红虾薄切，系一个好特别嘅菜式，将红虾压成薄片，仍能保持虾嘅肉质同原有嘅鲜味，口感唔错。呢度牛扒都好多款，而且主张减少烹调时间令肉质保持鲜嫩，所以餐牌上只有顶级牛腰扒建议七成熟，我哋就选择咗顶级牛腰扒配特浓红酒汁同松露薯条。牛扒汁系另上，所以可以清晰见到牛腰扒嘅肉质同纹理。牛扒下仲有软滑嘅薯蓉同炒过嘅杂菌。而伴碟嘅黑松露薯条亦都相当出色，新鲜炸起嘅薯条洒上黑松露碎，另外附上黑松露沙律酱，啖啖充满黑松露香味。另外仲叫咗比较玩味十足嘅鬼佬黯然销魂饭，佢嘅叉烧以鸭胸代替猪肉，食起上嚟又别有一番风味。我唔肯定佢嘅鸡蛋系咪用上日本高级别嘅兰王，不过蛋黄嘅色泽就睇得出并非普通货色。半熟嘅蛋黄用嚟混入饭之中特别香口。呢度嘅环境令你忍唔住要叫返两杯饮品chill番吓。小店杂果宾治果味浓郁，并非平时饮开嘅糖水。柚子盛放加入咗GIN酒，但酒味唔算太浓，都好容易入口，加上佢嘅茉莉茶底，配合柚子同青柠嘅味道，感觉仍然好清新。