新南苑私房菜 (已結業)

难得今日两公婆行经尖沙咀，唔使凑住两只化骨龙🤣一于去食餐好。朋友推介嚟呢间新南院私房菜，话最近食过好正的，我哋一于嚟试吓。一入到呢间舖头，我老公觉得好惊喜，因为佢系超级英雄迷，里面有好多超级英雄Figure，比食客欣赏，打卡一流，佢睇咗一轮先至坐返埋位。😁我哋嗌咗个晚市牛牛餐，招牌麻辣鸡煲或者麻辣鸭血毛血旺二选其一可以任食，好抵！我哋拣咗麻辣鸭血毛血旺，里面有鸭血、猪皮、水鱿、牛柏叶、豆卜、大豆芽、椰菜花。鸭血很嫩滑，充满鸭香，水鱿同牛柏叶够爽口，有口感，成道菜麻、辣、鲜、香俱全，正～我哋拣咗浓香沙嗲汤底，汤底送来嘅时候已经非常香浓，食落香而不辣，真不错！之后到牛牛拼盘来😍有安格斯牛小排、手切牛颈脊、熊本一口牛、美国和牛、美国极上牛，渌一阵已经可以食，啲牛肉质鲜嫩，牛味重，有种入口就溶嘅感觉，必食推介！