聯興潮州飯店

营业中

休息中

呢间潮州野真心又抵食又好食，今晚6大1细叫咗都几多野，包括当造嘅薄壳、韭菜猪红、水瓜烙、白饭鱼煎蛋、虾枣、蚝仔粥、沙茶酱肉丝炒河同埋椒丝腐乳通菜。虽然已经踏入八月，d薄壳都好食，不过似乎仲未够肥美，中秋之前要食多次希望可以肥美啲。韭菜猪红落咗沙茶酱煮特别惹味。因为打算叫蚝仔粥，所以唔食蚝饼改为叫水瓜烙，水瓜够爽够香口，有啲花生碎点缀一下，点鱼露味道更佳。因为见佢有新鲜白饭鱼但系又唔想椒盐咁热气，所以就叫白饭鱼煎蛋，简简单单好味道。潮式虾枣唔系道道有，呢度嘅虾枣好味，一定要点埋佢个海鲜酱。蚝仔新鲜肥美所以用黎整蚝仔粥就非常理想，d方鱼粒令窝蚝仔粥更加好味。因为在座有人唔食牛，所以就叫沙茶酱肉丝炒河，d沙茶酱连埋花生碎简直系完美配搭，呢个炒河极力推介。椒丝腐乳通菜够镬气，都好好味。食咗咁多样野才$640，抵食到吓窒左我，下次会再去食过。