王朝潮盛館 (已結業)

上次同屋企人食过，觉得唔错，又近屋企附近，今晚无煮饭，所以又过来食。上次叫左鹅片三拼，今次试吓鹅件双拼；仲叫左酸菜鱼、西兰花炒带子及椒盐竹炭豆腐。鹅件双拼（鹅件、墨鱼）今次试吓有骨嘅鹅件，卤水汁保持一贯嘅水准，调味啱啱好，我觉得配鹅件比鹅片好食，墨鱼一样新鲜弹牙，配上卤水豆腐底，冇得输。酸菜鱼妈妈唔系好食得辣，都觉得呢个好好食，鱼片非常之嫩滑，鱼汤鲜甜得来酸酸地辣辣地，非常好饮，配菜有酸菜、木耳、莴笋及芽菜，都几丰富。西兰花炒带子今次带子熟度煮得刚刚好，配上翠绿爽甜西兰花，好味。椒盐竹炭豆腐炸到香脆嘅竹炭外层，配上嫩滑嘅豆腐，加上辣辣地嘅椒盐，非常之香口惹味。