潮食閣 (已結業)

平日系葵涌广场行街，间间小食都让我目不暇给，真系排队食都要排足几个月先食得晒！今日去葵广拎之前订嘅衫，行入Top 世界立眼见呢间平日排晒队嘅潮食阁人少少，口痕叫左一件极邪恶芝士拉丝棒同一客脆味炸鲜奶。上个月其实已经食过佢嘅炸软壳蟹同炸薯格觉得好好味，对于佢嘅炸物都唔陌生。今次嘅芝士拉丝棒都唔例外，热辣辣炸起咬落一拉芝士都唔断，配埋沙律酱食好似无咁热气，不过我就系钟意热气，唔配酱芝士味会更出，食都底系魔师肠，乜唔系停产咩，仲系呢只味嘅，教我如何不爱他呢（注：楼下某一长龙小店嘅蜜椒肠仔已经换左其他牌子，伤心）。炸鲜奶唔系度度有得食，有时要酒楼餐厅炸去一大碟大大旧好怀旧下，虽然潮食阁嘅炸鲜奶细细旧，但系咬落唔系净系得炸粉架，相反炸粉好薄，一咬鲜奶膏就冲出黎喇！点埋炼奶真系好肥又好好食呀！平时见人少少就好捉紧机会呀，唔会闲闲地等十几廿分钟架。