影片
更多
2021-03-09
968 浏览
间舖头有啲难揾，舖头门口连个名都揾唔到，不过一黎到见到条人龙就知系佢la。呢度得专做虾汤既沾面，得三款面拣，分别系虾汁酱油沾面、虾汁味噌沾面，同埋虾汁蕃茄沾面。我自己就觉得选择少冇所谓，最紧要好食。同埋我成日都觉得通常得几款嘢拣既舖头，都系特别好食😂可能因为佢地专做果几样嘢。排紧队果阵，店员已经攞定纸比我地落单，一入到去好快就有得食。最后排左差唔多半个钟，不过可能因为我假日去，如果平日去或者会快啲。我最欣赏佢呢度既防疫卫生做得好足，一入到去，我就见到佢啲筷子全部都用个胶杯cup住，然后每个位都有一盒纸巾，感觉干净。另外，坐低一阵，店员好快就攞左支消毒喷雾黎帮我地喷下对手先🤲真系令我好impressed，好少出面餐厅会做到咁，最多系台面摆定支消毒酒精比人用，佢呢度系真系劲快劲主动过黎帮我地喷对手😂 除左个环境好干净，店员好好之外，个主角个面都好抵赞！真心呢间沾面店可以话系我暂时心目中既no. 1 沾面店。我坐既位啱啱好对正个厨房，可以望住个拉面师傅整既过程，我见到佢每一块叉烧都有用火枪烧过🔥然后每一份面，佢都有用个秤去秤重，制作认真。越望令我越期待😍同埋比较特别既系佢枱面除左七味粉之外
1️⃣虾汁味噌沾面（$89）
沾面汤入面有好多樱花虾，只只都有咁上下大，同啲面一齐食好正。另外入面仲有一只糖心蛋同埋两大块叉烧。呢度既糖心蛋好好味，佢系原只上，冇切开一半既，食落去好流心，一咬落去，就见到啲蛋汁渗紧出黎🤤而叉烧方面，佢好特别，唔洗切成一块块圆形既样，而系条状既，仲要都几大份，有两大条。叉烧系偏瘦既，我就唔钟意啲肥淋淋既叉烧，所以呢个就好啱我胃口。叉烧系炙烧过之后，油脂感出多左黎，食落唔会有好干柴既感觉，反而几有味。个汤底浓得黎唔会太咸，虾味好香，而味噌亦都令个虾味既浓度提升左一个层次。另外推荐试下加佢既wasabi柚子汁同埋樱花虾醋，加左之后，感觉层次感又再提升，虾汤加少少酸酸既味，令成个虾味更加出，亦都令个汤感觉冇咁油腻。 除左个汤汁出色之外，呢度既面都好啱我口味，佢呢度既面冇过冷河，系热既，但系面质依然非常弹牙，唔会一夹就断，而且面既粗幼度都啱啱好，挂汤效果一流！ 食晒之后，可以叫店员加汤饮埋净低既沾面汁，我第一次，一滴都冇净，饮晒最尾沾面既汤佢。通常沾面个汁，最尾就算加左汤落去比人饮，都会有啲太咸，我通常都系饮半碗就算。但系呢个，唔会太咸！虾味好浓！加完汤之后，就系一碗好好饮既樱花虾汤！
2️⃣虾汁酱油沾面（$79）
原本以为酱油汤底会偏咸一啲，但系唔洗wor😲一饮啖汤，对比味噌汤底，佢系偏甜少少，但系都系好好味啊。个汤底唔会令人觉得越食越腻，可以一啖接一啖，浓厚既虾味，搭配少少酱油既清甜，好味！ 最尾加汤饮，呢个既味道比起味噌汤底果款稍为淡啲，但系就多一股甜味，虾味一样好浓，饮落更加似一碗虾汤，好好饮啊。
张贴
