中記

营业中

休息中

呢间喺湾仔骆克道熟食中心屹立咗多年嘅中菜餐厅中记小厨，最近喺网上同家人口中得知佢有呢间平民饭堂嘅存在，可以算系聚餐嘅一大之选，而佢哋嘅CP值好高，所以我同小女友收工就去试吓。德国咸猪手：无谂到熟食中心入面嘅中菜餐厅有得食德国咸猪手，而佢哋一啲都唔差。猪手劲大只，CP值好高，好细心咁起哂骨，所以食落系啖啖肉。佢呢度做到皮脆肉嫩，外皮酥脆无比，肉质软嫩，调味得宜，唔会话太咸，蘸埋佢哋提供嘅酸辣酱汁就更加惹味。啫啫鸡煲：用料丰富，火候十足，鸡肉仍然嫩滑多汁。潮式蚝仔煎蛋：份量好多，肉碎，蚝仔同蛋嘅比例好均匀，而蚝仔够哂新鲜，令到其鲜味更能突出。椒盐鲜鱿：鲜鱿弹牙，椒盐劲惹味。串烧：呢度嘅串烧种类繁多，有多款肉食，海鲜，蔬菜，而佢哋呢度嘅牛肋肉同牛舌就好推荐，前者肉味香浓，肉汁丰富，CP值好高，而后者因为采用厚切，所以食落更有咬口，佢哋呢度嘅串烧即点即烧，同埋会采用生烧，所以更能食到原汁原味。汁烧鱿鱼须：鱿鱼须加咗啲秘制酱汁去烧，食落更加香甜同惹味，令人一食上瘾。蒜蓉烧原条茄子：原条茄子烧得够哂稔，蒜蓉份量好足，蒜味劲浓郁，入哂味。