麺屋こころ (軒尼詩道)

营业中

休息中

拉面沾面都食唔少，但系真系未试过食呢个日式捞面，我对捞面嘅印象仲系以前五蚊七仔捞面，营多捞面真系称得上世界十大发明，应该颁发个诺贝尔奖俾发明营多嘅人。讲返间餐厅，喺修顿附近，大快活隔离，一间橙色一间白色好明显，一眼就应该揾得到餐厅。第一次食就试返啲正路嘢，所以好冇冒险精神咁要咗个正宗全料捞面算，另外因为肚饿就顺便叫晒佢两款小食试埋。正宗捞面嘅材料我懒得介绍，自己识字睇图啦。个面到咗之后职员会同你讲店舖嘅建议食法，分开四part，先捞匀就咁食三份一，加点椒食多三份一，然后落佢哋嘅自制香醋食埋𠮶三份一，留一啖可以加饭捞埋剩低嘅酱汁。个面辣辣哋不过好惹味，而且同其他嘅材料相当夹。咁一个专业嘅食评系咪应该有碗面捞完同埋加咗饭之后嘅相？我喺喥答你我唔系一个专业嘅打手，你要睇靓相你睇错食评，睇返𠮶啲收咗钱嘅食评啦。小食方面有炸鸡同饺子，炸鸡不过不失，饺子比较特别啲，系蒸饺而唔系煎饺，呢样比较少见。埋单冇加一，第一次食日式捞面，整体感觉几好，餐厅亦都好光猛同干净，唯一系个肉碎有少少辣味，唔食得辣嘅人未必顶得到，如果可以选择辣嘅程度会好啲。