老馮茶居 (海寶花園)

呢间小店成日排长龙，今日试咗，佢D点心真系有料到。虽然块皮唔算好薄，不过虾饺D馅都几新鲜，D虾肉有弹性。佢个潮州粉果反而有惊喜，块皮唔会黐立立一pat pat，入面嘅馅料同样新鲜，尤其是佢个花生同埋沙葛。呢度嘅炸芋角都做得唔错，炸得够松够脆，但系又唔会食到成口油，入面个芋蓉都几靓。山竹牛肉系厨师推介咁就梗系要试下啦，呢个都做得出色，唔会有𠮶阵梳打粉乸过嘅味，牛肉球入面啲牛肉有粗有幼，咬落去质感口感都几好。葱花虾米肠够滑，就咁点麻酱甜酱辣酱已经好正。叉烧包啲叉烧几靓，唔会因为谂住塞喺个包入面就求其拉揾啲肉加啲叉烧酱入去就算数。鸭脚扎最劲就系有柚皮，真系好耐冇食过柚皮。