新東記火鍋店 (已搬遷) 新店位置

今年係第二年同另一半再嚟呢度打邊爐慶祝聖誕節，訂檯時指明要坐露台，因為空氣流通啲打邊爐會舒服啲。我哋揀左麻辣湯併蕃茄薯仔湯，麻辣湯嗰邊湯料有豬紅同肥腸，蕃茄薯仔湯就清清地，淥菜同醉雞翼出味啲✌🏻火鍋料方面，由於我唔係好舒服，而另一半唔食海鮮，所以我哋就冇叫好多嘢食。首先講下呢碟牛頸脊，例牌嘅份量對於我哋兩個啱啱好，肉質腍，肥瘦適中。我哋都點咗毛肚，佢切到咁大片，淥好真係好爽脆好好咬口。主角係醉雞翼，我哋真係為咗佢再嚟架！因為打邊爐嘅醉雞通常都冇邊間特別好好食，但係呢個真係好驚喜！好入味！所以極力推介放去啲清清地嘅湯入面淥。至於個墨魚汁墨丸，口感唔錯，爽口，入面有啲墨魚粒咬下，但係味道唔夠鮮味，主要係調味料嘅味道。我哋都點咗牛舌，通常牛舌都好少食到好差嘅，呢度都係啦。