52C Medium Rare (已結業)

今日去佐敦食晏，呢间52C Medium Rare第一个感觉好似文青cafe，但原来系食烧肉嘅。虽然地方唔算好大，但餐厅设有两层，楼下主力做石烧同定食。装修简约舒服，采光度高，通风系统做得唔错，食完烧肉都唔会一阵味，就算出面35度高温，喺呢度食烧肉都唔会觉得辛苦。下昼行到攰仲可以入嚟饮杯特饮，食啲小食，倾下计都几chill。楼上嘅网烧环境都唔错，自助形式为主，钟意freestyle嘅就啱晒。呢度嘅牛肉选用咗400日嘅美国壳饲牛，我哋首先选择咗牛小排石烧套餐。牛小排属于牛嘅胸肋骨部位，脂肪含量较高，充满大理石纹，肉质鲜美。调味料有蒜蓉烧汁同黑椒盐，不过我觉得靓牛咩都唔使落，食原汁原味就已经最好味。另外就选择咗封门柳石烧套餐。封门柳其实系牛嘅横膈膜肌肉，每只牛只有一条，数量珍贵，肉味最重，油花就较少，口感更胜牛小排。套餐仲配有前菜沙律，系新鲜沙律菜配芝麻酱。餐汤系罗宋汤，酸酸美味又多蔬菜。白饭用上珍珠米，所以粒粒饱满，配牛肉食真系可以食多几碗饭。我朋友唔想饮冻饮，店员特登去攞罐冇雪过嘅茶，呢啲细心位值得加分。原来佢哋仲有外带套餐，横掂屋企有烤炉，下次可以嚟帮衬。