稻香超級漁港 (南豐廣場) (已結業)

过几日就中秋节，屋企人决定提早庆祝，地点拣咗最近长辈居住嘅将军澳，订咗位于南丰广场嘅稻香。去到等早段食客交枱后入座，𠮶度枱比较窄，因为有小朋友亦有Bb，推bb车要麻烦其他食客让位置经过。可能临近节日，而呢度价钱亦算抵，但系酒楼人手真系太少，我哋每次叫职员举手5分钟都无人理，多次要离座揾职员。饭我哋由上第二个菜已经叫，到上尾二个菜先嚟，重要有啲生，所以无食到叫职员收咗。蒸鱼系食完所有嘢再等15分钟先嚟，全程好无奈。食物方面份量及味道可以，而且价钱相宜，另外每位加$14可以任饮任食自助吧嘅饮品同甜品，选择都唔少，有汽水，豆浆，清热茶类，杏仁茶，雪糕等等。稻香烧鹅皇，份量够，又唔会鞋口，唔错。热石脆皮乳猪，都系传统烧乳猪好味啲。沙姜鸡，鸡肉算嫩滑亦唔会太咸。上汤虾球伊面，虾球大大只够爽口，不过无咩鲜味，伊面炆得够入味，汁够多。红烧豆腐同鱼滑野菌浸菜苗都两都普通。西兰花炒带子，带子大大粒够鲜味。虾酱鲜鱿圈炒通菜，我食到系咸鱼味同有咸鱼嘅骨，鲜鱿唔太多但好大件，几惹味。等咗好耐嘅清蒸龙趸仔肉质鲜嫩。